Så der står vi då på hytta, utan komfyr, men med eit par enkle kokeplater. Lammesteika som skulle steikast sakte og lenge i omnen verkar som ein fjern draum. Sjølve påskemiddagen er i ferd med å hamne på viddene. Men vent, går det ikkje an å surre den i gryta og la litt væske sørgje for varmefordelinga?

For å omskrive ordtaket ein smule; naud lærer rådlaus kokk å improvisere. For nokre år sidan trefte eg eit kokkelag frå Vicenza i Italia. Dei var her til lands for å marknadsføre norsk tørrfisk, merkeleg nok. Utpå kvelden kom vi i prat om kva ein gjer når reiskapen sviktar?

Jau då, kunne ein av dei fortelje. Bryllaupet ute på bondelandet for fleire hundre gjester var i ferd med å ende i skandale. Gasskomfyrane virka ikkje. Gjestane var svoltne, og brura i ferd med å bli ilter. Plutseleg fekk kokken ein ide Petter Smart verdig. Han bad assistentane om å tømme dei høge, romslege stativa der mat og dekketøy var plassert. Fram med metervis med aluminiumsfolie. Stativa blei kledd, bål tent på bakken og kjøttet steikt mens dei latinske nervane roa seg.

Slik er det med oss lenger nord og. Vi treng ikkje fortvile sjølv om fasilitetane på kjøkkenet er enkle, og noko så kvardagsleg som ein steikeomn ikkje finns på mils avstand. Ei av dei første påskene på svigerforeldra mine si hytte blei lammesteika bruna i lag med litt grønsaker i gryta. Med eit enkelt steiketermometer plassert midt i den surra lammesteika hadde eg full kontroll på resultatet. Med litt vin og kraft i gryta, blei sausen til – med naturleg tilsig av kjøttsaftene frå steika.

I steikepanna blei poteter og rotgrønsaker i båtar steikt mens steika kvilte, til dei var klare. Enkelt, greitt og rustikt. På den måten kjem lammesmaken til sin rett… Og frå våre italienske vener knabbar vi sjølvsagt ideen om at kvitlauk og fersk rosmarin gjer underverk med heilnorsk lammesteik. Oppskrifta bør halde til minst fem, seks sjeler. Men husk å ha med steiketermometeret på hytta – eller der du måtte vere!

Lammesteik

• Om lag 1,5 kilo surra lammesteik
• Blada frå 1-2 kvister fersk rosmarin
• 2-3 båtar kvitlauk
• Salt og peppar

Til gryta:

• 1-2 ss soya- eller maisolje
• 1 stor gulrot
• 1 stor lauk
• ½ purrelauk
• 1 -2 fedd kvitlauk
• 1 rosmarinkvist
• 1 laurbærblad
• 2-3 dl kvitvin
• 5-6 dl lammekraft (for eksempel på boks frå Jacobs)
• Salt og peppar

Dersom du beiner ut lammesteika sjølv, kan du fylle det med kvitlauk og rosmarin. Skrell kvitlauken, fjern stilken/kjernen. Finhakk kvitlauken og rosmarinen, og fordel den inni steika før du bind den saman. Dersom steika er ferdig surra i butikk, gnir du kvitlauk og rosmarin godt inn steika, og drysser på litt salt og peppar.

Skrell og grovhakk gulrot, lauk og purrelauk. Kvitlauken kan du ha i heil, med eller utan skal.

Varm olja i gryta. Brun lammesteika på alle sider i eit par minutt. Ha i  grønsakene og rosmarinkvisten. La blandinga surre nokre minutt, før du heller over kvitvinen. La vinen redusere til halv mengde. Hell over kraft og eventuelt litt kaldt vatn. Kok opp. Stikk inn steiketermometeret i midten av steika. Senk varmen. La lammesteika trekke på svak varme med lokk på til kjernetemperaturen stig litt over 50 grader. Når du skal ta ut steika, avheng av om du vil ha rosa eller godt steikt lammekjøtt.

Sist eg lagde denne varianten av surra lammesteik, to eg ut steika då termometeret viste 55 graders kjernetemperatur (temperaturen i midten av steika). Etter at kjøttet hadde kvilt på ein lun stad ved komfyren i eit drygt kvarter, var temperaturen stege til 65 grader – og var dermed i ferd med å miste den rosa fargen. Det betyr at temperaturen i steika stig meir etter at du tar den vekk frå varmen enn om du bruker steikeomn. Tar du ut steika på om lag 52-53 grader, og ser at kjernetemperaturen ligg på om lag 62 grader ved servering, får du eit flott og saftig resultat.

Mens steika kviler, siler du av krafta og koker den ned til du får ein intens, god smak. Smak til med salt og peppar.

Rotgrønsaker

• Om lag 800 gram poteter, gjerne franske amandine eller norske mandelpoteter
• 2-3 store gulrøter
• 2-3 store persillerøter
• 1 stor raud lauk
• 3-4 fedd kvitlauk
• Eventuelt eit par never sukkererter og/eller brekkbønner
• Salt og peppar
• Ein klunk rapsolje eller vanleg olivenolje

Skrell grønsakene og del dei i båtar. Kvitlauken kan behalde skalet på. Steik grønsakene i ei romsleg steikepanne med høge kantar olje til dei er møre, mens lammesteika kviler. Eit kvarter (eller mindre) er nok. Ha i sukkerertene/brekkbønnene det siste minuttet.

Dersom du skulle ha steikeomn tilgjengeleg, har du alle grønsakene i den største omnsforma, drysser på litt salt og peppar og vender oljen inn med hendene. Steik grønsakene på 150 grader i om lag ein halv time, eller til dei er møre.

Når poteter og grønsaker er ferdige, skjærer lammesteika i 3-5 millimeter tjukke skiver. Hell litt saus i botnen av tallerkenen, ha over rotgrønnsaker og passeleg tjukke skiver av lammesteik.