Eg fann, eg fann! Jøss, ligger det fire krabbeskjell fylt til randen med krabbekjøtt i fryseboksen? OK, då er det garantert tid for krabbekaker.

Krabbe er ferskvare. Og rein nyting når sesongen står på utover hausten og vinteren. Men i blant blir abstinensen for stor, sjølv når eg kjem over ferdigreinsa krabbeskjell i ferskvaredisken på heilt feil årstid. I blant blir råvarene gløymt og gøymt ein stad under fiskefiletar spart til fiskesuppa eller fiskekaker som snart burde fortærast.

Krabben (og hummaren) kan tåle eit halvår i fryseboksen under optimale forhold og minus 18 grader, ein del lenger på endå lågare temperatur. Men eg innrømmer det glatt, krabbe som ikkje lenger fersk gjer seg best i godt selskap med ferske varer – veldig gjerne i lag med lyr eller hyse, som begge er proppfulle av bindemiddel og god smak.

Taskekrabben (Cancer pagurus) er intens i smaken i utgangspunktet, for eksempel sterkare i smaken enn sitt irske motstykke. Etter ein runde i fryseboksen blir den skarpare i smaken, den klyp deg nesten på tunga og munnhola. Og fersk eller frossen, den tåler masse «juling», altså kraftig smaksfølgje.

Hokrabben kan vandre fleire mil på havbotnen, hannkrabben er litt meir «heimekjær», dersom vi snakkar om taskekrabben. I alt finns det 30 ulike krabbeslag langs Norskekysten. Og det finns krabbeslag i alle verdsdelar. I Søraust-Asia blir krabben svidd av i woken med peppar og chili. I Louisiana i dei amerikanske sørstatane har eg fått servert krabbekaker med brennheit Tabasco-saus til.

I dei aller fleste krabbekakeoppskrifter eg har sett er får krabben dominere blant ingrediensane, ofte er gammalt brød med i oppskrifta for å dempe smaken og binde farsen betre. Både fiskehandlaren min i Tønsberg og eg syns ein tredjedel krabbekjøtt og to tredjedelar med kvit fisk med mykje naturleg bindemiddel, aller helst hyse eller lyr, er perfekt. Elles blir krabbesmaken for intens. Så kan resten av ingrediensane hever smaken til enda større høgder. Kapers er knallgodt til.

Dersom du treng å tenke på kolesterolen, kan du merke deg at brunkjøttet inneheld om lag 15 prosent feitt, rogna det halve og klokjøttet berre 0,2 prosent. Med andre ord kan du lage knallsunne krabbekaker med huse/lyr og klokjøtt.

Krabbekaker med kapers

• 300 gram reinsa krabbekjøtt naturell (for eksempel frå to skjell a 150 gram)
• 600 gram filet frå lyr eller hyse (alternativt sei eller torsk)
• Ein liten bunt vårløk
• 4 store skeier kapers
• Eit par store skeier fersk (flat)persille
• 2 ts salt
• Litt peppar

Dersom du kverner fiskefileten sjølv, bør den køyrast gjennom kverna på kjøkkenmaskina to gonger, gjerne gjennom holskiva med mellomstore hol (3-4 millimeter).

Dersom du bruker kjøkkenmaskin med roterande blad, held det å male den i 30 sekund.

Finhakk kapers, persille og vårløk.

Finn fram ein bolle, og bland godt i hop fiskefarse, krabbekjøtt og resten av ingrediensane.

Form farsen til passe store kaker med ei stor skei, og steik dei på middels sterk varme i ein nøytral olje – gjerne solsikkeolje – til dei er gyldenbrune på begge sider.

Server krabbekakene med fersk loff og heimelagd remulade.