Billig beef jerky

Tørket biffkjøtt-beef jerky_1000Tynnskore, hurtigtørka og eventuelt røykt kjøtt har blitt svinedyr trendmat under det amerikanske namnet «beef jerky». Men faktum er at du fikser biffen sjølv, akkurat slik samar, urfolk og folk flest rundt om på heile kloden har gjort det i uminnelege tider.

Kiloprisen for denne forma for tørka kjøtt er sanselaust høg, og namnet på ingrediensane startar ofte med ein E. Amerikanske produsentar har for lengst sett ein umetteleg marknad for ei vare som har vore heilt sentral i matstellet til folk flest i alle verdshjørne.

Har du mørt biffkjøtt frå lam, storfe, reinsdyr eller kva du eigentleg vil, er det i prinsippet berre å trimme vekk feittet, skjere kjøttet i ein halv centimeter tjukke skiver, salte eller marinere det og tørke kjøttet nokre timer på svak varme. Samane kallar slikt tørka kjøtt gåjkkebierggo. Det amerikanske namnet beef jerky kjem truleg frå quechua-indianarane sitt ord «ch’arki», som rett og slett betyr «tørka, salta kjøtt».

Tørkeprosessen reduserer drastisk aktiviteten blant vassavhengige mikroorganismar som gjer at kjøttet rotnar. Saltet hindrar og bakterievekst. Det same gjer røyken som mange amerikanarar utsett kjøttet for.

Kjøttet må tørkast relativt raskt for å hindre den uønskte bakterieveksten i den kritiske perioden då kjøttet endå ikkje har tørka heilt. For å få til dette, må altså kjøttet skjerast tynt.

På Far min sitt kjøkken blir kjøttstrimlane normalt marinert nokre timer i ei godt salta blanding, og deretter tørka med kjøkkenpapir og deretter lagt i steikeomnen eller i ei enkel tørkemaskin på 50 grader.

Beef jerky er tørka turmat på sitt beste. Ikkje rart urfolk, som ofte var på farten, slik som samiske reinbønder, tørka og frakta med seg slik næringsrik kost. Tørkinga sørgjer for at vekta går drastisk ned, samstundes som næringsstoffa ikkje forsvinn i for stor grad.

Normalt inneheld ein 30-gram stor pakke med beef jerky 10-15 gram protein, fattige eitt gram feitt og 0-3 gram karbohydrat. Ettersom du sjølv no lærer å lage ditt eige tørka kjøtt, styrer du saltmengdene heilt sjølv. Veldig mange oppskrifter på nett – med amerikansk innfallsvinkel – inneheld etter mitt syn alt for store mengder salt, og er i tillegg så krydra at det knapt er mulig å kjenne kjøtsmaken i smaksbiletet.

Oppskrift på beef jerky med asiatisk smak

  • Om lag ein kilo flatbiff
  • ½ desiliter Worcestershire sauce
  • 1 desiliter soyasaus
  • ½ desiliter teriyaki-saus
  • 1 teskei honning
  • 2 teskeier nykverna, svart peppar
  • 2 teskeier løkpulver
  • 1 teskei med flak av tørka, rød chili (eller ein knivodd cayenne)
  • Ein neve fersk koriander

Skjær vekk alt feitt og ytre sener på biffen. Bruk ein mjuk filetkniv, og vær forsiktig, så skjærer du ikkje vekk meir enn du treng.

Dersom du vil gjere det lettare å skjære opp kjøttet i tynne skiver, kan du legge det i fryseboksen i ein time eller to.

Skjær 4-5 millimeter tjukke skiver på tvers av fibrene i kjøttet.

Bland i hop Worcestershire sauce, soyasaus, teriyaki-saus, peppar, løkpulver, chili finhakka, fersk coriander i ein bolle. Ha kjøttet oppi i ein pose med låsemekanisme (eller slå knute på posen). Hell over marinaden, og snu godt på posen, slik at marinaden dekker alt kjøttet. La posen ligge i kjøleskapet i tre til seks timar, og snu på den inni mellom.

Ta kjøttet ut av posen, og legg det i eit dørslag slik at det får rent av seg mesteparten av marinaden. Tørk kjøttet tørt med kjøkkenpapir.

Sett steikeomnen på 50 grader, og eller finn fram tørkeapparatet. Legg kjøttbitane tett i tett, men ikkje oppå kvarandre. Tørk kjøttet på 50 grade. Det tørka kjøttet er ferdig når det framleis er så mjukt at du kan slite det frå kvarandre ned tennene, men ikkje så lenge at det brekker når du bøyer ein kjøttstrimmel.

Husk at steikeomnsdøra må stå på gløtt for at fukta skal trekke ut, og kjøttet skal tørke tilstrekkeleg. Det kan fort ta 8-12 timer, litt mindre tid (5-7 timar) med eit tørkeapparat (dehydrator). Slike kan koste fleire tusen kroner, om du ikkje går for billigvarianten til nokre hundrelappar.

Når kjøttet har tørka lenge nok, kan det halde seg to, tre månader dersom det blir oppbevart i ein lufttett behaldar.

 

(Visited 4 270 times, 3 visits today)

Legg att eit svar

Epostadressa di blir ikkje synleg. Påkravde felt er merka *