Far min vaks opp på det vêrharde Bremangerlandet i Sunnfjord, med havet som næraste nabo. Der hausta dei for det meste frå havet. Fisk sto ofte på menyen heile veka, til og med på kviledagen. Søndag blei fiskekakene steikt opp, varma i brun saus og servert med kokte poteter og det som måtte finnast av grønsaker.

Nokre tiår seinare var familien vår blitt industriarbeidarar lengre inne i fjorden. Men tradisjonane var med på lasset. Fryseboksen hadde i løpet av etterkrigstida blitt allemannseige, og sørgja for at fiskekakene kunne overvintre når veret var for hardt for fiske eller det ikkje var sesong for hyse (også kjend som kolje), lyr eller torsk.

Eit av dei sterkaste minna mine var å luske rundt på kjøkkenet når ho mor skulle i gang med fiskekakeproduksjonen. Planen til dei vaksne var å fryse ned kakene i porsjonspakkar til meir fiskefattige dagar. Vi yngste, og langt meir kortsiktig tenkande, sneik seg gjerne inn på kjøkkenet med gaffelen i høgrehanda, klar til å stikke i rette augneblikk og forsvinne lynraskt ut av kjøkkenet med ei glovarm fiskekake på spidd.

I smug forsøkte vi å nyte glovarme bitar så raskt at vi ikkje blei tekne på fersken, mens vi høyrde ropet frå kjøkkenet: ”Kven er det som har stukke av med fiskekakene mine?” For far min gjekk visst sjølv i barndommen når ferske fiskekaker dukka opp på kjøkkenet…

I mitt vaksne liv har eg forsøkt å etterlikne fiskekakene til mor mi, og gjort den tabba mange har gjort, nemleg å fryse lyr, hyse eller torsk før du har lagd fiskekaker av råvarene. Frosen fisk er ikkje eigna til å lage fiskebollar og fiskekaker av, fordi den har mista mykje av bindevevet sitt under frysinga. Lyr og hyse er spesielt eigna, frodi den inneheld mykje bindevev – og smakar fabelaktig i fiskefarse.

Oppskrifta under er resultatet av mange rundar med kontrollmåling og veging av mor sin produksjon, som føregår etter prinsippet om at ”ein har i det som trengs, kor mykje av kvar ingrediens aner eg ikkje”…

Mor Anne-Katharina. sine fiskekaker (nok til om lag 40 middels store fiskekaker, eller 20 store)

• 1,2 kilo lyr/hyse og torsk (om lag tre fjerdedelar lyr/hyse)
• Om lag 6 dl mjølk
• 3 ss potetmjøl
• ½ ts malt muskat
• ½ ts peppar
• Eventuelt ein liten neve med finhakka persille eller andre ferske urter du syns passar til fiskekakene
• Margarin/olje til steiking

Det er viktig at alle råvarene er kalde når du startar med å kverne og blande i hop fiskefarsen! Dette for å sikre at deiga blir fast og fin.

Mor mi heng lyren/torsken opp på ein kjølig stad over natta etter at den er sløyd og alt blod og hinner er fjerna. Dette for å sikre at fiskekjøttet utviklar stivelse.

Fileter fisken, eller få fiskehandlaren til å gjere det for deg. Kjøper du fisken, bør den med andre ord gjerne vere ein dag gammal. Finn fram ein bolle, legg eit tefat opp ned i botnen av bollen, og legg den filetere fisken oppi. Sett den i kjøleskapet til du skal fortsette fiskekakeproduksjonen. Du kan gjerne legge kjøkkenmaskinkverna i kjøleskapet og.

Sett fram kjøkkenmaskina, monter kjøttkverna og finn fram fiskefiletane frå kjøleskapet. Mal fisken, deretter farsen, to gonger gjennom forstykket med dei minste hola.

Sett bollen på plass i kjøkkenmaskina med farsen i, finn fram eltekroken og ha i saltet.

La farsen bli elta eit par minutt, slik at saltet rekk å binde deiga.

Spe med litt og litt mjølk, og sjå etter at deiga absorberer/trekker til seg mjølka kvar gong.

Når om lag halvparten av mjølka er spedd i, stopper du maskina, og har i potetmjølet. La deiga gå eit minutt til, til den blir ganske så fast.

Spe med resten av mjølka, litt og litt, på same måte som i starten. Dersom skal ha ein litt fast og dissande konsistens. Dersom farsen er for fast, sper du med litt meir mjølk. Smak til med muskat og peppar (og eventuelt ferske urter), og køyr farsen nokre rundar slik at krydderet blandar seg godt.

Steik ei lita ”prøvekake” i steikepanna på middels høg varme i margarin eller olje. Dersom den smakar som den skal, steiker du resten av fiskekakene. Viss ikkje, blandar du i det krydderet du syns manglar.

Finn fram ei skei, og eit krus med lunka vatn. Bruk skeia og hent opp litt farse i gongen. Form fiskekakene med innsida av handa og skeia.

Steik fiskekakene på middels høg varme i steikepanna. Bruk gjerne berre margarin, eller margarin og nøytral olje som tåler høg temperatur, for eksempel soya- eller maisolje.

Heime hos oss blir fiskekakene enten etne på ferske skiver med smør på, nysteikte med potetstappe og reven gulrot eller servert i ein brun (fiske)saus med kokte/dampa grønsaker og poteter.

Andre fiskeslag

Du kan gjerne bruke denne oppskrifta på andre (ferske) fiskeslag – for eksempel sild, men vær då merksam på at ikkje all fisk har like godt bindevev. Mitt råd er derfor å redusere mengda mjølk, slik at du bruker om lag 3 desiliter væske per kilo fisk – eller meir om det trengs.

Fiskekaker med kjøkkenmaskin

Du kan og bruke kjøkkenmaskin med roterande kniv.

Køyr då fisken i to minutt til du har ei glatt farse, ha i salt, og køyr endå eitt minutt. Ha så i potetmjøl, og spe med mjølka til farsen er passe fast. Smak til med krydder (muskat, peppar og eventuelt andre ingrediensar) før du former og steiker fiskekakene.

Mange brukar egg som ekstra bindemiddel i staden for potetmjøl. Til ein kilo fisk, og 3-4 desiliter mjølk, held det med tre egg og 18 gram salt – samt anna krydder.