La meg smake fiskekakene dine, så skal eg fortelje kven du er. Mange norske fiskematprodusentar er minst like opptatt av inntening som kvalitet. Min fiskehandlar lager fabelaktige fiskekaker, og er så opptatt av at kundane skal ete sunn mat frå havet, at han gjerne deler oppskrifta med omverda.

For alle som tar seg tid til å sløye, filetere og dele opp fisken, er fiskekaker og andre fiskefarseprodukt ein framifrå plass å plassere dei mindre bitane som ikkje er så stilige å servere middagsgjestar i fint lag.

Dessverre er det mange fiskematprodusentar som er vel ivrige med å gje kakene fjongare namn enn dei fortener eller spe ut kakene med alt anna enn hyse, lyr, sei eller annan kvitfisk med godt med bindemiddel og smak, som gjer fiskekaker til festmat til kvardags.

Ta deg tid til å studere innhaldslista neste gong du er i butikken. Ikkje la deg overraska om dei billigaste består av 50 prosent vatn. Du treng ikkje måpe over at steinbitkakene berre har nokre prosent av den eksklusive fisken mellom dei store mengdene billig råvare, for eksempel kvit fisk med eksotiske namn – deriblant kvitlaks (også kalla vassild), pacific whiting eller alaska pollock. Billig råvare blir flydd frossen inn frå fjerne hamner, for å bli til ein av dei norskaste av norske rettar.

Det er ei kjennsgjerning av fiskekaker lagd på samleband inneheld alt frå 40 til 80 prosent fisk, og sjeldan smakar så godt som nysteikte kaker lagd med kjærleg hand av ein fiskehandlar nær deg, eller ei mor som med like stor omsorg fileterer, kverner, elter og steiker verdas best fiskekaker.

Oppskrift på fiskehandlar Morten sine fiskekaker

• 1 kilo fersk kvit fisk, minst halvparten hyse, lyr eller sei
• 1 stor skei salt (om sommaren treng fisken mindre salt)
• 1 egg
• 1 stor skei potetmjøl
• 2,5 desiliter mjølk
• Litt peppar
• Litt muskat
• Rapsolje og ekte meierismør til steikinga

Til fiskekaker og annan fiskefarsemat må du bruke fersk fisk. Frossen fisk mister bindeevna si, og eigner seg ikkje. Fisken må ikkje vere heilt fersk, dødsstivheita bør ha gått ut av fisken. To døgn i vanlig kjøleskap ok for sjølvfiska fisk.

Fileter fisken, skjær vekk skinn og bein. Del fisken i mindre biter.

Vær merksam på at alle ingrediensane til fiskekakene må vere iskalde for at du skal få eit godt resultat!

Finn fram kjøttkverna (for eksempel den på kjøkkenmaskina), legg den gjerne i fryseboksen ein halv times tid før du startar på oppmalinga.

Mal all fisken ein gong gjennom holskiva med 5 millimeter store hol. På denne måten får du fiskekaker med ein ganske grov konsistens.

Legg den malte fisken over i eit dørslag, som du setter i ein bolle og plasserer på kjøl over natta. Då får fisken rent av seg vatn, og som aukar bindeevna.

Ha den kalde, malte fisken over i ein kjøkkenmaskin med eltekrok. Ha i salt, litt muskat og peppar. Elt til deiga blir som ein klump, det vil seie til saltet binder opp farsen.

Ha i egget. Fortsett å elte deiga, til egget er godt blanda inn. Spe med litt og litt mjølk, og ha i potetmjølet. Deigen skal til slutt vere fast og god som ei brøddeig. La deiga kvile i ti minutt.

Varm opp nokre skeier rapsolje og smør i steikepanna. Det er viktig at panna ikkje har for svak varme når du steiker fiskekakene.

Form passer store kaker med hendene. Steik dei gyldenbrune på begge sider. Dersom kakene slepp eit kvitaktig stoff i steikepanna, nemleg protein, har du ikkje køyrt inn saltet godt nok, og farsen har ikkje kvilt lenge nok.

Fiskekakene til fiskehandlar Morten held seg fem døgn på kjøl, men frys gjerne ned fiskekakene i porsjonspakker til neste gang du får lyst på.