Er du i feriemodus, eller rett og slett ikkje ivrig på å diske opp med ein imponerande vanskeleg middag, er fiskepakke redninga. Å varte opp med flyndre, laks, torsk eller kva du vil «en papillote» er enkelt og greitt ein sikker vinnar, særleg med ein fløyelsmjuk fløytesaus til.
For nokre år sidan var eg med og lagde mat til ei stort selskap på Ekerø utanfor Stockholm. Vi sto på kjøkkenet og preppa maten eit par dagar i flott sommarvær. Beina var såre, og hovudet i eit lags modus der det berre handla om å fullføre neste oppgåve på den lange lista av gjeremål. Ironisk nok var mat – i alle fall tanken på å ete sjølv – det siste vi tenkte på.
På ettermiddagen andre dagen kom damene i huset heim frå eit velsmakande og rimeleg lunsjmåltid ved sjøkanten, slik ein berre kan få det i Sverige – og med seg hadde dei ein boks med flyndre i fløytesaus med fennikel, rød løk, dill og nypoteter til.
Vi sette oss ned i bakhagen med den lunkne maten, og roa senka seg brått. Sesongferske råvarer lagd på enkelt vis, og servert respekt for gjestane.
Av og til kjem tiltaksløysa over meg, eg orkar eigentleg ikkje tanken på å lage middagsmat. Ein av gongane kom eg til å tenke på denne enkle fiskemiddagen frå Ekerø. Oppskrifta under er eit audmjukt forsøk på å finne igjen den enkle gleda frå fiskelunsjen på andre sida av kjølen for nokre år tilbake.
Det er lite som kan gå gale om du lager slike enkle fiskepakker. Men ikkje bli freista til å erstatte kremfløyta med matfløyte. Sistnemnte tåler ikkje høg varme over lengre periodar, då skil fløyta seg og blir småklumpete. Det er mest eit estetisk problem, men det er sjølvsagt best om sausen blir krema og fin.
Kva fiske du har i pakka er opp til deg, men det er ingen ting i vegen for å blande ulike fiskeslag med kvart sitt særpreg.
Oppskrift på fiskepakke/fisk «en papillote» med laks, lyr og uer/rødfisk
- 600-800 gram fisk, for eksempel laks, lyr og uer/rødfisk – men bruk fisk du syns smaker godt i lag
- 12-16 små nypoteter
- Ein fennikel
- Ein middels stor rød løk
- 2 desiliter kremfløyte (ikkje matfløyte, den vil skilje seg og bli småklumpete)
- 1 desiliter god kvitvin
- ½ desiliter vatn
- Ein neve fersk dill
- Salt og peppar
Vask nypotetene (om dei ikkje er vaska frå før) og kok dei lett møre i vatn med rikelege saltmengder. Hell av vatnet, la potetene dampe av seg, og del dei i passe store biter.
Del fennikelen i to på langs. Skjær den i tynne skiver (her bruker eg ei mandolin, ein kjøkkenreiskap som skjær jamt tynne skiver), og legg fennikelskivene i iskaldt vatn.
Legg to flak med aluminiumsfolie som er om lag ein halv gangar ein halv meter oppå kvarandre, og til slutt eit flak bakepapir øvst. Brett opp kantane, slik at du har ei flate på om lag 20 gangar 30 centimeter å fordele fisk, poteter etc. på. Du kan eventuelt presse folien nedi ei så stor form.
Fyr opp grillen med ei sone for indirekte varme (eller sett steikeomnen på 200 grader over- og undervarme).
Legg eit lag med poteter nedst. Fisk opp fennikelskivene frå vatnet, la dei renne av seg på litt kjøkkenpapir og fordel skivene over potetene. Strø på litt salt, peppar og dill.
Skjær fisken i litt grove biter, og strø over litt salt.
Skrell den røde løken, del den på midten og kutt den i tynne skiver (også her bruker eg mandolinen). Fordel løken over fisken, og ha over litt meir fersk dill.
Bland i hop kremfløyte, kvitvin og vatn. Hell væska over fisken.
Brett opp kantane, og forsegle pakka slik at ikkje væska i pakka kan renne ut. Legg pakka forsiktig på indirekte varme på grillen – eller legg den midt i steikeomnen på rist.
Bak fiskepakka i 10-15 minutt, til fisken er klar. Når eg legg den på grillen, pleier eg å kontrollmåle temperaturen på riste der pakka skal ligge med steiketermometeret.
La fisken ligge uforstyrra i minst ti minutt. Dersom du opnar pakka for tidleg, vil dampen sleppe ut og du mister det fine trykket inni pakka som gjer at maten dampar seg ferdig.
Når fisken er ferdig, er det berre å servere.