Jippi, det er plukkfisk til middag!

Vestlandsk plukkfisk med klippfisk-lettsalta røkt torsk og gulrot_1000Svært mange av oss som vaks opp langs kysten på 70- og 80-talet hadde eit mildt sagt ambivalent forhold til fersk fisk. Men jubelen sto i taket kvar gong eg kom heim og fekk plukkfisk til middag.

Litt rart, kanskje, for plukkfisk er restemat. Det er fiskeavdelinga sin versjon av lapskaus, restane av fisk og grønsaker kokt til godt over grensa av det akseptable, som kjapt kan diskast om til eit lite kvardagsleg festmåltid.

– Du kan berre lage plukkfisk av klippfiskrestar, insisterer far min. Det var i alle fall slik farmor lagde retten. Sjølv syns det er delt siger mellom klippfisken og lettsalta, røykt torsk. Apropos siger, Bocuse d’Or-vinnar  Ørjan Johannessen frå Austevoll avslørte rette etter sigeren i Lyon i 2015 at heime vil han ha mat som er rask å lage, og plukkfisk er blant favorittane.

Min variant er godkjent av far min, men mor mi syns eg godt kunne ha mosa potetene. Du gjer akkurat som du vil. Far min sin favorittvariant er lagd med utgangspunkt i ein tradisjonell kvit saus, men andre nøyer seg med å mose potetene, spe dei med smør og mjølk og bland inn fisk og gulrøtter.

Guttungen syns plukkfisk er stas, men mauler aller helst baconet vi serverer attåt. Det er dog ei anna historie…

Oppskrift på vestlandsk plukkfisk

(nok til fire svoltne personar)

  • 500-600 gram lettsalta og røykt torsk/kvit fisk, eller tilsvarande mengder utvatna klippfisk
  • 600 gram potet
  • 2 stor gulrøtter
  • 200 gram sellerirot (eller frosne erter, om du liker det)
  • 50 gram smør (usalta dersom du bruker lettsalta fisk)
  • 50 gram kveitemjøl
  • Ein stor løk
  • 5-6 desiliter mjølk
  • En neve fersk (flat)persille
  • Salt og peppar

Start med den kvite sausen. Skrell og finhakk løken.

Smelt smøret i ein kjele på middels høg varme. Ha i løken, og la den frese eit par minutt, til den har mjukna. Ha i kveitemjølet. Visp godt.

Spe med litt og litt mjølk, mens du vispar ut klumpane av sausen. Det er spesielt viktig med intens visping i starten. La sausen småputre i fem minutt, slik at mjølsmaken forsvinn. Sett sausen på lågaste varme.

Kok opp usalta vatn og trekk den lettsalta, røykte fisken til den flakar seg, altså i 8-10 minutt. Ta fisken ut av kokevatnet, og fjern bein og skinn. Dersom du har kald, ferdigkokt fisk/klippfisk, er det berre å reinse seg for bein og skinn.

Skrell gulrot, potet og sellerirot. Del grønsakene i terningar. Dersom du vil ha mosa poteter, koker du dei for seg i usalta vatn, og mosar dei etterpå.

Finhakk og fres baconet til det er sprøtt, og legg det over på lit kjøkkenpapir på ein tallerken, slik at feittet får renne av seg.

Hell av vatnet på grønsakene. Ha dei i sausen, i lag med fisken. Vend godt om med ei sleiv. Smak til med salt og peppar. Ha i finhakka persille.

Serverer plukkfisken med bacon, og gjerne flatbrød med godt smør til.

(Visited 2 448 times, 1 visits today)

One thought on “Jippi, det er plukkfisk til middag!

  1. Pingback: Kalas med klippfiskbollar - Far min sitt kjøkkenFar min sitt kjøkken

Legg att eit svar

Epostadressa di blir ikkje synleg. Påkravde felt er merka *