Klippfiskbollar med smak av barndom

Klippfiskboller med hvitløksmajones_600-2Smaken av «plukkfisk» frå barndommen kjem snikande når du friterer klippfiskbollar av restane med tørka, salta fisk. Perfekte for seg sjølv, eller ein av mange smårettar du kan by gjestane på.

Vi som vaks opp med fisk åtte dagar i veka, er kanskje ikkje alltid like begeistra for alle minner om fiskemåltid som nærast måtte pressast ned. Men klippfisken blir eg meir og meir glad i. Den kan varierast i det uendelege. Gode, latinske koneemne skulle som kjent minst kjenne ei unik oppskrift for kvar dag av året.

Her langs våre eigne kystar, der klippfisken har vore produsert i fleire hundre år, er variasjonane langt færre. Vi er mange som stort sett berre fekk klippfisken servert med potet, gulrot og smør, på gode dagar var smøret bytta ut med kvit saus med løk i.

Klippfiskbollane – som portugisarane kallar bolinhos de bacalhau – er den latinske slektningen til plukkfisken, restemiddagen vi hadde dagen etter det store klippfiskmåltidet. Skulle ein først ta seg bryet med å vatne ut klippfisk, burde ein minst satse på to dagar med middag.

I plukkfisken blei klippfisk, potet, gulrot og gjerne nokre baconbitar knekt i hop med rikeleg mengder kvit saus. Solide mengder salt, solide mengder smak av torsken sin forvandling gjennom tørkinga i vêr og vind om våren.

Oppskrift på klippfiskbollar (gjev om lag 20-25 bollar)

Retten krev altså litt planlegging, klippfisk skal normalt vatnast ut eit døgn per tjuknad på fisken.

  • 500 gram ferdig utvatna og reinsa klippfisk (tilsvarar om lag 400 gram uvatna klippfisk)
  • 300 gram mandelpoteter
  • 4 kvitløksbåtar
  • Nokre desiliter mjølk
  • 4 ss hakket persille
  • Salt, peppar og kajennepeppar

Når fisken er vatna ut, heller du av vatnet, deler den i passe store bitar og kokar den mør i mjølk, på svak varme – slik at fisken og mjølka ikkje brenn seg. Fisk fisken ut av kokemjølka og over i ein bolle. Ta vare på mjølka.

Skrell potetene og kvitløken. Fjern stilken i kvitløken. Kok potet og kvitløk i usalta vatn til dei er møte. Hell av vatnet og damp vekk vatnet.

No skal du mose potetene og kvitløken i lag med klippfisken. Her er det veldig fint å ha ei potetpresse. Men du kan også presse potetene og kvitløken gjennom eit dørslag.

Ha i finhakka persille. Smak til med salt, peppar og gjerne ein knivodd kajennepeppar.

Bland røra godt i hop. Den er lettast å arbeide med dersom den er litt fast. Spe gjerne med litt av kokemjølka eller litt god olivenolje. Sett røra kaldt ei lita stund, og form deretter klippfiskbollar med ein diameter på fire, fem centimeter. Du kan og fryse bollane ned til du skal bruke dei.

Til panering:

  • 1 dl kveitemjøl
  • 2 egg
  • 6 skiver daggammal loff
  • Om lag ein halv liter soya- eller maisolje (til friteringa)

Sett fram tre bollar på rekke og rad. Fyll den første med kveitemjølet, den andre med lettpiska egg og den siste med loffrestane som du kan mose i kjøkkenmaskina.

Kok opp oljen i ein kjele. Perfekt friteringstemperatur er om lag 180 grader. Sett gjerne ei tresleiv ned i olje. Når det boblar rundt treverket, er oljen varm nok.

Vend kvar bolle først i kveitemjøl, deretter i egg og til slutt i loffsmular. Friter klippfiskbollane i 30-50 sekund, til dei er lysebrune (men ikkje svartsvidde).

Server klippfiskbollane med kvitløksmajones (aïoli), gjerne med litt finhakka persille i.

Legg att eit svar

Epostadressa di blir ikkje synleg. Påkravde felt er merka *

Denne nettstaden brukar Akismet for å redusere søppelpost. Lær korleis kommentarane dine vert handsama.