Krabbe i godt selskap

Krabbesesongen på hausten er kort og intens for mange av oss. Og denne ettertrakta råvara er utan tvil aller best heilt fersk og litt lunka. Nedfrysing blir sjeldan så bra som ein skulle ønske. Men dersom du har nokre hundre gram krabbekjøtt på lur, er denne enkle retten med krabbe på ein brødbit fin å ha i bakhand.

Som eg kanskje har fortalt før arbeidde farmor på krabbefabrikken på Nødset på Bremangerlandet i Sogn og Fjordane. Der blei kvar einaste krabbe stima i tre kvarter, deretter avkjølt og delt opp. Når paven, den smått farlege delen av krabben var fjerna, starta arbeidet med å få ut all mat av buret, klørne og ikkje minst sjølve skjelettet, der festene til klørne sit.

For nokre år sidan hadde far min og eg besøk av kubanske venner. Vestlandet viste seg frå si beste sida. På langbordet på hyttetunet  låg ei uanstendig mengde krabber. Etter at far og mor mi hadde vist gjestane korleis ein kan plukke ut kvitt og svært velsmakande krabbekjøtt frå skjelettet, starta ei intens jakt som enda i svære haugar med mat mange krabbeentusiastar berre kaster.

Kort fortalt drar du ut skjelettet av den nykokte krabben, etter å ha fjerna alle klør. Omtrent der luka er plassert på skjelettet, er det ei lita fordjuping. Del over krabbeskjelettet her, og vips ser du små rom og kanalar med masse mat i. Brusken mellom romma pellar du vekk med enden på ei teskei, som er den beste reiskapen for å pirke ut krabbekjøttet og.

Til oppskrifta under er det godt med både rogn og anna etande innmat frå krabben. Har du ikkje fersk chili, kan du gjerne bruke ein knivodd cayennepeppar, krabben tåler nemleg mykje tøffe smaksfølgje. Du kan og bytte ut eplet med rogn, eller berre pynte med litt rogn – slik som på biletet.

Dersom du skal bruke frossen krabbe, bør du la den tine i kjøleskapet over natta, og ta den fram på kjøkkenbenken ein time eller to før bruk.

Krabbetoast

  • 1 halvsteikt baguette
  • 200 gram reinsa krabbekjøtt
  • 1 avokado
  • 1 agurk
  • 2 stenger stangselleri
  • Eit syrleg eple (for eksempel Granny Smith)
  • Ein lime eller ein halv til ein sitron
  • 2 ss aioli (kvitlauksmajones)
  • 2 ss fersk dill, pluss litt til pynt
  • Ein solid klunk olivenolje
  • Ferskpressa saft frå ein kvart sitron
  • Salt og peppar

Sett steikeomnen på 170 grader (over- og undervarme). Skjær bagetten i tynne skiver, dypp brødbitane i olivenolje og steik i steikeomn i 8-9 minutt på 170 grader.

Skyll og finhakk grønsakene og eple. Ta gjerne ut den mjukaste innmaten av agurken. Den smakar ganske vassent.

Legg eplebitane og avokadoen i botnen av ein bolle. Mos avokadoen lett med ein gaffel. Skvis over ferskpressa limesaft (eller sitronsaft.)  På den måten blir verken avokado eller eplebitane brune.

Bland saman finhakka grønsaker med krabbe og aioli.

Smak til med salt, cayenne og eventuelt peppar (og kanskje litt meir lime- eller sitronsaft).

La krabbeblandinga stå litt (gjerne nokre timer), slik at smakane set seg. Dersom blandinga skal stå litt, kan du ha avokadosteinen oppi røra, då blir ikkje avokado og eple så misfarga.

Fordel om lag ei svær spiseskei krabbeblanding på kvar brødbit, og server som ein forrett eller fingermat – gjerne i lag med lakserøre på toast.

(Visited 636 times, 1 visits today)

2 thoughts on “Krabbe i godt selskap

  1. Kjempefin blogg! Eg er på jakt etter ein video som viser rensking av «buret» (som du kallar skjelettet) Eg lærte ein teknikk av dei som «gjekk på krabben» på 1950-talet. Det var sesongarbeidarar på Sauesund Preserving i Brattvågen, eldre og yngre damer som ikkje var opptekne med barnepass eller husdyrstell i september-november. Måten, som eg enno brukar er:
    1. Vippe ut alle klofesta med ein bordkniv som eg stikk inn mellom underste delen av klofestet, på framsida, og den harde, solide kanten på undersida av buret. Småklofesta kjem ut reine og går i rasket. Med storklofesta blir det med ein del fisk.
    2. Deler buret i tre med ein skarp (sagtagga) bordkniv. To snitt gjennom dei 5 opningane etter klofesta på kvar side, på skrå mot den inste delen (toppen) av buret. Snittar så langt frå midten som råd, med reine delevegger på midtdelen.
    3. Mesteparten av fisken er i midtdelen og kan plukkast ut av dei opne lommene med ein vanleg bordkniv.
    4. Dei to sideskalkane er litt meir kompliserte fordi resten (ytterkanten) av dei indre deleveggene må fjernast for å kome til lommene i den ytre delen av buret. Fisken her kan og plukkast ut med bordkniven. Lommene for klørne er ikkje lukka. Den ytre delen av deleveggene er foskjøven i forhold til den indre delen, med ei spalteopning mellom, som du kan sjå på sideskalkane.

    Liknar dette på metoden du har lært?

    Klorensinga blir gjort med bordkniven i eine handa og kloa i den andre:
    1. Med bakken på kniven, evt skaftet på ein stålkniv, knus hengslet på innsida av framleddet og bryt laus framdelen.
    2. Knus skalet på framdelen nok til at det kan plukkast av.
    3. Fisken i dei to inste ledda kan plukkast ut gjennom enden med ein ikkje altfor brei bordkniv.

    Småklørne er ei sak for seg. Kutt og sug, rett i munnen!

    • Ivar, tusen takk for gode ord, og ikkje minst fabelaktig framgangsmåte for reinsing av krabben! Ja, dette er om lag slik eg har lært det av far min, som igjen lærte det av mor si (farmor mi), som arbeidde på krabbefabrikk på Nødset i Bremanger i si tid. Pappa har fortalt at dei brukte trykkluft på å blåse ut kjøttet frå klofestene og kammera innanfor. Dei kokte og krabben relativt lenge i forhold til mange andre oppskrifter, nettopp for at kjøttet skulle løsne lett (http://farminsittkjokken.com/sot-historie-fra-ramsalte-farvatn/). Noterer meg videoønsket, blei absolutt inspirert til å forsøke. Mulig eg må invitere deg meg på innspeling:)

Legg att eit svar

Epostadressa di blir ikkje synleg. Påkravde felt er merka *