Langsteikt juleribbe med sprø svor

langsteikt-juleribbe-med-perfekt-svor_1000Om ikkje anna, så kan Far min sitt kjøkken gje deg ein nesten bombesikker metode for å sikre deg ei sjukt saftig svineribbe med sprø svor til jul, to resultat som nesten er ei sjølvmotseiing.

Då eg for nokre år sidan flytta på landet, og fekk eit kjøkken på 25 kvadrat, var to steikeomnar eit krav. Vi likar å halde vennelag. Fleire varmekjelder gjev større spelerom. Men eg har sjeldan blitt så skuffa som over varmeeigenskapane til den største av desse omnane. Over- og undervarmen er svak. Varmlufta fordeler varmen ujamt, slik at deler av det som ligg i omnen blir oversteikt før resten er ferdig.

Rekk opp handa dei som har slite med å få sprø svor dei siste åra? Skuldig! Eg har brukt sprø svor-metoden eg har lært direkte frå Ingrid Espelid Hovig – og tatt med nokre innspel frå Eivind Hellstrøm. I svigermor sin eldre omn går det fin-fint. Men ettersom steikeomnen min ikkje er eit vidunder, har eg gått på nederlag som er vanskeleg å takle for ein mann…

Uansett, løysinga for svineribba sin del blei altså å lage eit «mikroklima» inni steikeomnen, der varmen fordeler seg likt og kjøttet bokstaveleg tala når nye høgder. Eg har prøvd med både leirgryta med lokk – den mest geniale kokereiskapen sidan Adam og Eva og med ei vanleg eldfast form med lokk. Du kan gjerne lage eit lokk med eit par lag aluminiumsfolie, det funkar brillefint det ok.

Metoden, som mi bloggvenninne Helle frå helleskitchen.org sette meg på tanken av, kjem i to, tre steg.

  1. Først setter du ribba i gryta med svoren opp på 100 grader i sju og ein halv time.
  2. Når kvelden nærmar seg, gassar du opp til 200 grader, utan å røre lokket. Smekk på fingeren!
  3. Då kan du sjekke svoren. Normalt vil den trenge eit ekstra puff til himmels. Eg brukar grillelementet nokre minutt, mens «poff»-lyden brer seg i kjøkkenet.

Løyndomen bak dette «mirakelet» er altså at ribba sakte men sikkert blir gjennomsteikt, utan å miste kjøttsaftene. Det er sjølvsagt eit krav med eit visst feittlag under svoren for å få eitt sprøtt resultat. Eg heller dessutan i eit glass med eplemost eller eplesider, slik at du får eit dampande heitt miljø i forma eller gryta.

Og det aller beste? At du faktisk kan stå opp passe tidleg, sette maten i steikeomnen og nyte dagen – julekveld eller annan kveld, vel vitande om at svoren blir sprø og «kokken» og gjestane fornøgde.

PS: Dersom du går for ei frossen ribbe, så husk å ta tine den sakte eit par døgn i kjøleskapet!

Oppskrift på saktesteikt ribbe med sprø svor

(nok til fire personar)

  • Ei tynnribbe på om lag to kilo
  • Ei stor skei grovknust sort peppar
  • To store skeier fingersalt (om lag 25 gram)
  • Eit til to glas (om lag 4 desiliter) eplemost eller eplesider

Eit til to døgn før ribba skal serverast, gnir du den inn med salt og peppar, legg den med svoren ned i ei langpanne eller form, dekker den til med folie og setter den kjølig. Dersom svoren ikkje er ruta opp, fikser du dette før du krydrar ribba.

Sett på steikeomnen på 100 grader. Har du ein god steikeomen, kan du bruke over- og undervarme, eg bruker varmluft. Dersom du bruker leirgryte, må du huske å sette den i kaldt vatn minst ein halvtime før den skal i omnen. Men med ei ribbe på to kilo, må du nok ty til ei eldfast form med lokk for å få plass. Ribba bør ligge flatt i botnen av forma/gryta.

Tørk av ribbestykket med kjøkkenpapir og legg det i forma/gryta med svoren opp. Hell i eplemosten. Ha over lokket (eventuelt ei dobbelt lokk med aluminiumsfolie som er heilt tett rundt kanten av forma).

Sett forma i steikeomnen og la den stå heilt uforstyrra dei nesten sju og ein halv timane. Dersom du lettar på lokket, er prosjektet ute å køyre!

Etter sju og ein halv time, hever du temperaturen til 200 grader. Etter nokre minutt vil du høyre meir «aktivitet» frå ribba. Etter om lag 20 minutt tar du av lokket og sjekkar resultatet. Sett på grillelementet i steikeomnen, og la ribbesvoren bli sprø. Men her må du passe på, den kan fort bli svart. Akkurat kor lenge svoren treng, avheng av grillintensiteten, avstanden til elementet etc.

La svineribba kvile minst 20 minutt. I mellomtida kan du sile krafta frå ribbesteikinga, lage ei jamning med smør og kveitemjøl, ha i krafta og smake til sausen med salt, peppar og gjerne ein skvis ferskpressa sitronjus.

Vil du har poteter, medisterkaker og julepølser til, er dette tida for å ordne alt dette.

Langtidssteikt svineribbe med sprø svor eigner seg godt til frokost eller lunsj dagen etter og.

(Visited 755 times, 1 visits today)

Legg att eit svar

Epostadressa di blir ikkje synleg. Påkravde felt er merka *