Langtidssteikt og sprø lammeribbe for late folk

Langtidsstekt lammeribbe med ovnsbakte grønsaker og poteter2_1000Langs kysten ender dei aller fleste lammeribbene opp som pinnekjøtt – eller ribbe, som vi seier på Far min sitt kjøkken. Men lammribba er ein seriøst god konkurrent til spareribs, om du er klar for det.

Sistnemnte delikatesse har blitt like vanleg som taco og pizza her heime, sjølv om begge rettane har røter langt frå våre trakter.

Eg kan ikkje huske å ha fått servert lammeribbene på anna vis enn som pinnekjøtt i juletida. Dei har kanskje hamna i fårikålgryta, men spenstigare oppskrifter kan eg ikkje erindrast, om ein ser vekk frå meisterkokk Harald Osa sin tapasrett basert på røykt og dampa pinnekjøtt.

Den retten blei servert i lokala til Opplysningskontoret for kjøtt på Økern i Oslo, under eit reportasjeoppdrag eg dekka som journalist. Gjengen dei fleste kjenner som matprat.no-gjengen var ivrige på kjøtt, ettersom lønningsposane blei fylt av kjøttsamvirket.

Men eg trefte mykje flotte, matinteresserte folk der. Den siste tida eg vanka i lokala etter inspirasjon, blei eg kjent med Knut Ivar Munthe Olsen – autodidakt kokk som – akkurat som  eg – var og er veldig glad i lammekjøtt.

På eit seinare tidspunkt utveksla eg nokre e-postar med Knut Ivar. Han kunne fortelje at lammeribba hadde blitt ein slager etter at han tok over hotelldrifta på eit velkjent etablissement i Sogn. Ekstra bonus var det at lammeribba var ein svært rimeleg råvare.

Oppskrifta under har eg ikkje frå Knut Ivar, men eg håper eg ikkje gjer skam på lammet, som gjev oss så mange smaksopplevingar i haustsesongen. Dersom du ikkje har pakka ned grillen, kan du sjølvsagt grille lammeribba på indirekte varme den tida kjøttet treng før det slepp beina.

Retten er enkel, om du ser vekk frå tida det tar å gjere klar råvarene og vente på at lammeribba skal bli sprø og mør.

Langtidssteikt og sprø lammeribbe med rotgrønsaker

(nok til fire personer)

  • Om lag 2 kilo lammeribbe
  • 2-3 kvitløkbåtar
  • 2-3 store skeier finhakka rosmarin
  • To store skeier olivenolje
  • 200 gram sellerirot
  • 2 store persillerøter
  • 8 store poteter
  • 3 gulrøter
  • To røde løk
  • olivenolje
  • Godt fingersalt
  • Litt nykverna svart peppar

Om hausten finn du fersk lammeribbe i butikkane, i alle fall butikkar med ferskvaredisk eller respekt for kundane sine. Av og til er filetkammen på lammeribba med. I så fall ville eg ha kløyvd frå filetkammen frå resten av ribba. Fileten er ferdigsteikt på kort tid, og blir ein fabelaktig lammecarré. Resten av ribba treng lang steiketid, til kjøttet nærast fell av beina.

Ikkje bli skremt av kilomengda lammeribbe eg foreslår. Mykje av råvara består rett og slett av bein.

Sett steikeomnen på 250 grader (over- og undervarme).

Eg pleier å snu ribba med beina opp, og dele beina på midten, men utan å dele over heile ribba. På den måten blir det lettare å dele lammeribba i passe store serveringsstykke etterpå.

Snu ribba med kjøtt- og feittsida opp. Dersom feittet ikkje er ruta opp frå før, bruker du ein tapetkniv eller annan skarp kniv og skjærer ruter eit par, tre millimeter nedi svoren. Då vil feittet bli frigjort under steiking, og sørge for at lammeribba blir sprø og god, samtidig som kjøttet under svoren blir godt steikt.

Finn fram ein morter. Ha i finhakka kvitløk og rosmarin. Arbeid ingrediensane til ei ganske tjukk masse. Spe med litt nøytral olivenolje og om lag ei teskei med godt fingersalt. Mos blandinga litt til, og arbeid den inn feittsida på lammeribba. Gni godt, slik at smaken kjem godt inn i kjøttet.

Vask og skrubb av grønsakene med ein børste. Del poteta på langs i eit par centimeter tjukker båtar. Del også dei andre rotgrønsakene på langs, og deretter i to eller tre, slik at du får passe store serveringsbiter. Del rødløken i fire eller seks båtar, gjennom rotfestet, slik at den heng nokolunde i hop. Ha alle grønsakene i ei djupt omnspanne. Ha på litt nøytral olivenolje, fingersalt og nykverna peppar. Vend grønsakene godt rundt.

Legg lammeribbene med svorsida opp – oppå grønsakene. Sett forma midt i steikeomnen og la den stå i eit kvarter på 250 grader, før du skrur varmen ned på 150 grader.

Sjekk ribbene og grønsakene etter om lag ein times tid etter dette. Ribba skal vere sprø, og nesten falle frå beina, grønsakene skal vere møre og ha litt farge. La retten stå litt lenger om nødvendig.

Når ribba er ferdig, tar du den ut og legg den på ei stor skjerefjøl. Grønsakene kan stå litt lenger for å få meir farge. Skruv eventuelt opp varmen om det trengs.

Del lammeribbene i passe store serveringsbiter, mellom beina – og server med grønsaker til.

3 thoughts on “Langtidssteikt og sprø lammeribbe for late folk

  1. Lammeribbe var fast julemat i min far sitt kjøkken i Hallingdal, i mangel av gris der han vokste opp. Har laget det som ribbe i steikeovnen veldig enkelt med rosmarin, salt og pepper, med kokte poteter og kålrotstappe. En favoritt. Men skal såklart prøve din variant når jeg får kjøpt lammeribbe på Nesttun der en marokkaner har starta Bergen Kjøtt med masse fristende av okse og sau.

    • Herlig, Synnøve! Kjekt å høyre at far din utforska lammeribba og måten den kan smakast til:) Gler meg til å høyre korleis din variant blei! Og eg blir glad av å høyre at det dukkar opp nye slaktebutikkar, dessverre er det alt for mange som har blitt lagt ned. Viktig å bruke dei, ikkje minst fagkunnskapen dei sit inne med. Lukke til!

  2. Hei!
    Testa oppskrifta, fantastisk godt vart det! Takk!

    Eg har og noko ribbe av kje i frysaren, trur du eg kan nytta samme oppskrifta?

    Vennleg helsing Hilde

Legg att eit svar

Epostadressa di blir ikkje synleg. Påkravde felt er merka *

Denne nettstaden brukar Akismet for å redusere søppelpost. Lær korleis kommentarane dine vert handsama.