Saftig kjøttpudding frå Iungsdalen

Kjøttpudding-meat-loaf-med rømme_1000Kvar sommar drar vi som til dagleg lever på Far min sitt kjøkken til vakre Iungdalen i Skarvheimen. I desse grønne, fuktige dalstrøka er det overflod av mjølkeprodukt og kjøtt frå frittbeitande grisar. Slikt blir det saftig kjøttpudding av.

Iungsdalshytta er ei oase for ein som er matinteressert. DNT-hytta er bortimot sjølvberga når det gjeld mat som blir produsert på kjøkkenet. Langs vatnet beiter gris, sau, kyr og kalvar. I det vesle fjøset blir kyrne mjølka morgon og kveld. Rømma blir syrna og er ekte seterrømme, med om lag 35 prosent feitt.

Kjøttpuddingen du får servert av kokka Nadja på Iungsdalshytta er særs saftig og velsmakande. Det blir den takka vere den heimelagde svinekjøttdeiga og ikkje minst rømma. Potetmjøl og salt må til for å binde farsen.

Denne heimelagde kjøttpuddingen er milevis unna den fabrikkproduserte eg fekk i barndommen. Det næraste eg kjem er den svære «kjøttkaka mor mi lagde, fylt med grønsaker og servert med brun saus til.

Kjøttpuddingen har lange røter i europeisk matlaging, visstnok nemnt i romerske skrifter. Oppskriftene varierer frå land til land – og retten finns nesten over heile verda i ein eller annan variant.

Mange har i egg og brødsmular/brødkrum. Oppskrifta under har eg fått tilsendt frå Iungsdalshytta, og er litt justert når det gjeld rømmemengde. Nadja bruker om lag ein halv liter rømme per kilo kjøttdeig. Då må du i så fall ha i meir bindemiddel. Saftig blir resultatet uansett.

Oppskrifta på Nadja på Iungsdalshytta sin kjøttpudding

(Til 4 personer)

  • Ein kilo kjøttdeig frå svin
  • 2 desiliter seterrømme
  • 5 store skeier potetmjøl
  • 1 teskei malt muskat
  • 1-2 teskei(er) malt ingefær
  • 2 teskeier svart peppar
  • 5 strøkne teskeier salt

Sett steikeomnen på 180 grader. Plasser ei form med høge kantar nedst midt i omnen. Fyll forman med kokevarmt vatn til det står om la fire, fem centimeter oppe langs kanten på forma.

Smør ei brødform som rommar om lag to liter, og smør den med smør.

Finn fram kjøkkenmaskina. Ha i kjøttdeiga og monter k-kroken. Ha i salt og køyr deiga til den blir seig.

Ha i potetmjøl, ingefær, muskat og peppar. Køyr vidare eit minutts tid, til mjølet og krydderet har blanda seg godt. Ha i seterrømma, og køyre eit minutts tid til, til farsen er jamn og fin.

Steik ei lita «prøvekake» i steikepanna og sjekk om du er nøgd med konsistens og krydder. Viss ikkje, har du i meir av det du syns manglar.

Dersom du vil fylle kjøtpuddingen med grønsaker, deler du desse i terningar og forvellar dei eit minutts tid i lettsalta, kokande vatn, før du har dei i isvatn. La dei renne av seg i eit dørslag, slik at grønsakene får renne av seg, før du blander dei i røra.

Fyll brødforma med kjøttfarsen, og bruk slikkepotten til å fordele den utover. Dunk forma resolutt ned i skjerefjøla.

Steik kjøttpuddingen i vassbad på 180 grader i om lag ein time.

Server kjøttpuddingen lettkokte grønsaker, poteter og ein god brun saus.

Legg att eit svar

Epostadressa di blir ikkje synleg. Påkravde felt er merka *

Denne nettstaden brukar Akismet for å redusere søppelpost. Lær korleis kommentarane dine vert handsama.