Kongekrabben har krabba langt, riktig nok ikkje heilt frå Asia. Den trengte menneskeleg hjelp for å komme seg frå den verdsdelen til Europa. Men det er og menneskeleg å gje den smaksfølgje frå sørlegare strøk – nesten som i Singapore.
Ok, er du purist, så er ikkje denne oppskrifta heilt «innafor». Men den er i høgste grad inspirert av ein av favorittkokkane mine, Lars Barmen, som arbeidde i mange år i mellom anna Singapore.
Han lærte meg sin variant, som har mange av dei same smakane, kvitløk og østerssaus. Men den største forskjellen er at eg ikkje har brukt grovkverna svart peppar som første blir bruna i eit tørr steikepanne i heile korn, før du knuser korna, heller ikkje vin. Eg satsar heller på litt søtleg styrke frå fersk, rød chili.
Oppskrifta under er tatt litt på magekjensle, både søtleg og sterk, så den treng litt balanse av ein solid skvis lime.
Kongekrabben eg har brukt er flydd inn frå Finnmark takka vere gode kontaktar.
På 1960-talet syntes sovjetiske forskarar at det var ein glimrande ide å flytte kongekrabben (Paralithodes camtschaticus) frå Kamtsjatka-området i Stillehavet til Murmanskfjorden rett over norskegrensa i Finnmark. Sakte, men sikkert har denne rusken – som kan bli opptil ti kilo – spreidd seg aust- og vestover i det sørlige Barentshavet, mellom anna til våre kystar – og sikra gode inntekter for dei som kan fiske etter den.
Av alle krabbande vesen langs den norske kysten, kjem vanleg taskekrabbe og ikkje minst kongekrabbe veldig høgt opp på lista over favorittråvarer. Den har mykje eigensmak, er litt søt i kjøttsmak, og kan fint smaksettast med sterke smaker frå Asia. Den varmar like godt om sommaren som midt på vinteren, når all sjømat er på sitt beste.
Oppskrift på asiatisk chilikrabbe (nesten som i Singapore)
- Ein halv kilo kongekrabbe, helst rå
- 1 stor rød chili
- Ein løk
- 3-4 kvitløkbåtar
- Ein rød (fersk) chili
- Ein stor tommelfinger med ingefær
- 2-3 store skeier nøytral matolje (for eksempel solsikkeolje)
- 3 vårløk
- 3-4 ss lettsalta soyasaus
- 2-3 ss sweet chili saus
- 2-3 ss østerssaus
- Safta frå ein halv (eventuelt ein heil) lime
Del krabben med saks i ledda, og del eventuelt dei lengste ledda i to. fem, seks centimeter lange bitar er fint. Klipp laus den lyse delen av skalet på kongekrabben, om lag halvparten av skalet. Du må kanskje bruke fingrane for å lausne skall frå kjøtt, elles heng kjøttet fast når det fjernar skalet som skal vekk.
Fjern skalet frå ingefæren og kvitlauk. Del chilien på langs og fjern stilk og frø.
Finhakk chili, ingefær og kvitløk. Finn fram ei stor steikepanne (eg brukar den største Ikea leverer). Sett den på middels høg varme. Ha i solsikkeoljen, chili, ingefær og kvitløk. La alt saman surre under lett omrøring, men ikkje la kvitløken svi seg.
Legg kongekrabben med kjøttsida ned i steikepanna (altså med opninga du har klipt til). La krabben surre i om lag fem minutt. Vend litt på den inni mellom, men husk at kjøttsida skal vende ned.
Grovhakk vårløk, og ha den i steikepanna.
Ha i sausane, vend krabben godt rundt og skvis over ferskpressa limesaft. Smak til om sausen er fin på smak. Om den er for søt, har du i litt meir limesaft. Dryss over finhakka koriander og server retten med ein gong!