Barbecuesaus frå bakgarden

Pulled pork-barbecuesaus-BBQ sauce_1000God grillmat blir ikkje veldig mykje betre av å bli marinert. Det viktigaste er ein god rub, eller krydderblanding. Men grillkongen Craig Whitson og vi på Far min sitt kjøkken er einige om at det gjer seg veldig med ein heimelagd, smakfull barbecuesaus.

I åra eg arbeidde som matglad journalist lærte eg aldri meir om grilling – eller barbecue som den mildaste og mest langvarige metoden heiter i Amerika enn av møta med Craig Whitson. Han er amerikanaren med Stavanger-dialekt som kom til oljebyen – og ble værande. Heldigvis.

I løpet av desse åra trefte vi kvarandre mange gonger, og han var alltid smørblid læremeister med solide sveisehanskar og glovarme briketter på kulegrillen. Ein av gongane fyrte han opp reiskapen i bakgarden på restauranten Palace Grill i Oslo, og barbecuesausen akkompagnerte den rikhaldige menyen.

Det blei ein del diskusjonar, og eg blei raskt overtydd om at kvalitetsråvarer gnidd inn med ein hissig rub (tørr krydderblanding) steikt på indirekte og låg varme over lang tid var vegen til Mekka. I alle fall det ekte grillfolket sin veg.

Rub-a-dub’en til Craig finn du på denne sida. Lenger nede kan du sjå korleis du kan smelle i hop ein BBQ-saus som rekker mange dagar. Frys ned i porsjonspakkar det du ikkje brukar med det første.

I staden for å kopiere Craig rått, har eg gjort ein liten vri. Ved å koke inn eplesider og eplesidereddiken til det halve, får du ein meir intens smak. Dessutan pleier eg å la ein liten aluminiumsbakk med saus stå på indirekte varme på kulegrillen ein times tid, då får du tilført røyksmak og gjort barbecuesausen endå litt meir intens på smaken.

I tillegg bør du ta deg råd til å kjøpe boksar med verkeleg gode, hermetiske tomatar. I denne oppskrifta skal du ha fire av dei, så sjølv om du reduserer ned sausen, blir ikkje smaken betre enn det tomatane kan tilby av søtt og syrleg.

Er du glad i det ekstra sterke, kan du godt finkutte ein chili og surre den i kjelen i lag med løk og kvitløk før resten av ingrediensane skal oppi.

Ein marinade vil ikkje gjere tørt kjøtt av simpel kvalitet saftigare. Men om du langtidsgriller eit rimeleg kjøttstykke, for eksempel svinenakke – og diskar opp med pulled pork, er denne barbecuesausen på alle måtar med på å heve måltidet til nye høgder.

Oppskrift på Craigs barbecue-/BBQ-saus – med ein liten vri

  • 2 store skeier matolje (eller baconfeitt)
  • 1 stor løk
  • 2 kvitløkbåtar
  • 4 boksar á 400 gram hermetiske tomatar av god kvalitet
  • ½ desiliter eplesidereddik
  • 5 desiliter eplejuice
  • 1 desiliter brunt sukker
  • 1 stor skei Dijon-sennep
  • 1 stor skei med honningsennep (eller ei stor skei mild sennep, samt ei lita skei honning)
  • 1 stor skei Worcestershire-saus
  • 1 stor skei Rub-a-dub
  • 1/2 teskei salt
  • 1/2 teskei sort peppar
  • Ein fersk chili (eller 1/2 teskei kajennepeppar)

Skrell løk og kvitløk. Finhakk den og chilien.

Varm opp matoljen (eller baconfeittet) i ein større kjele til middel høg varme. Ha i løk, chili og kviløk, og den frese under omrøring nokre minutt – utan at den svir seg.

Ha i Rub-a-Dub, og la krydderet få varme seg eit minutt. Ha deretter i sennep og Worcestershire-saus. La alt frese litt til, før du har i eplesider og eplesidereddik. La den koke så lenge at halvparten av væska er kokt inn.

Ha i tomatar og sukker og barbecuesausen koke i om lag 40 minutt. Ta den av plata. Smak til med salt og peppar og køyr BBQ-sausen glatt med ein stavmiksar.

Hell over litt av sausen i ein aluminiumsbakk og la den stå på indirekte varme på kulegrillen, så får sausen litt god røyksmak og meir fylde.

(Visited 390 times, 1 visits today)

Legg att eit svar

Epostadressa di blir ikkje synleg. Påkravde felt er merka *

Denne nettstaden brukar Akismet for å redusere søppelpost. Lær korleis kommentarane din vert handsama.