Grilla klippfisk med småfrekk avokado- og ertemos

Grilla klippfisk med småfrekk avokado- og ertemos_1000Trass i at far min – og generasjonane før han – har produsert klippfisk i hundrevis av år, er grilling av klippfisken ein sjeldan syssel. Men den salte, faste torsken gjer seg veldig godt med eit kyss av røyk og glovarm grillrist, med ein stenk av olivenolje.

Dei fleste eg kjenner blir overraska når eg serverer grilla klippfisk. Og dei blir endå meir overraska over smaken. Klippfisken er salta og tørka til ein tredel av vekta er borte. Denne konserveringa gjer noko med smaken på torskekjøttet. Prosessen intensiverer smaken av torsk. Når fisken blir vatna ut, og deretter grilla, blir råvara heva til eit nytt nivå.

I dei latinske landa har eg mange gonger fått servert klippfisken grilla eller steikt. Tjukke og (alt for) salte stykke torsk som normalt blir servert heilt enkelt med potet, løk og rause mengder olivenolje. Den ekstra røyksmaken frå grillen taklar den tørka og salta torsken godt.

På Far min sitt kjøkken forsøker vi å variere klippfiskoppskriftene. Før denne retten blei servert ein ganske varm, norsk sommardag, kom eg til å tenke på såkalla guacamole på boks frå kjende produsentar. Den svenske forfattaren og journalisten Mats-Eric Nilsson avslørte i boka «Den hemmelige kokken» at store mengder avokado bytta ut med erter. Ertene fortener strengt tatt ikkje eit så dårleg rykte, sjølv om dei ikkje har noko i ein guacamole å gjere. Frosne erter er normalt ei utmerka råvare. Med litt sting frå ein grilla chili kjem både avokado og erter svært godt ut av det.

Men klippfisken har uansett hovudrolla i denne retten. Husk berre å vatne den godt ut før du griller den. Du kan alltids ettersalte fisken, men er den for salt er det ingen veg tilbake!

Oppskrift på grilla klippfisk med poteter og avokado- og ertemos med chili

  • Om lag 600 gram tørka klippfisk (blir om lag 800 gram når fisken er vatna ut)
  • Om lag 800 gram gode poteter
  • Nokre skeier med vanleg olivenolje
  • Eit par heile kvitløk
  • 8-12 sjalottløk
  • Salt (til kvitløken)

Legg fisken i kaldt vatn så lenge som den treng. Skift vatn dersom smaken på vatnet er veldig salt. Dersom klippfisken har skinn, drar du dette forsiktig av etter utvatninga. Då er det og lettare å dra ut eventuelle bein med ein matpinsett eller ei tang (som du bør ha på kjøkkenet).

Legg klippfisken inni eit reint kjøkkenhandkle, slik at du trekk ut fukta frå den yste delen av fisken.

Fyr opp grillen (dersom du bruker kolgrillen). Husk at du bør dele grillen opp i ei varm og ei kaldare sone som du kan flytte maten over på dersom varmen blir for intens.

Skjær eit snitt på tvers av toppen av kvitløkane. Ha over litt salt og olivenolje. Pakk sjalottløken – med skal – og kvitløken godt inni aluminiumsfolie med kvitløken ståande med den opna enden opp.

Når grillkola eller brikettane går frå å vere raudglødane til å blir gråaktige, legg du kvitløken eit par minutt over direkte varme, før du plasserer den i den «kalde» delen av grillen. Kvitløken og sjalottløken bør få stå i fred utan at du blir freista til å opne pakka i om lag 45 minutt.

Dersom du bruker gassgrill, held det å sette eit (eller to av dei tre gassblussa) på full varme fem minutt før, og skru varmen ned på middels når du starter grillinga.

Pensle chilien med litt olivenolje, og legg den rett på varmen eit par minutt. Legg den deretter på kald sone eit kvarters tid.

Vask potetene, og kok dei nesten møre i lettsalta vatn. Hell av vatnet, og la dei kjølne før du deler dei i passe tjukke skiver. Pensle potetskivene med olivenolje, og grill dei på direkte varme nokre få minutt, før du legg dei til side på den lune delen av grillen.

Når chili og kvitløk er ferdig bakt, kan du lage til avokado- og ertemosen med chili. Til denne treng du:

Avokado- og ertemos med chili

  • 3 desiliter vatn
  • 150 gram frosne grøne erter
  • Eit par middels store (og modne) avokado
  • To, tre bakte kvitløkbåtar
  • Safta frå ein halv lime
  • Salt og svart peppar
  • 1 grilla chili

Finn fram ein liten kjele, ha i vatn og kok opp dei frosne ertene. La dei småputre eit par minutt, før du heller av vatnet.

Ha dei i kjøkkenmaskina (av typen med roterane kniv) i lag med avokado, safta frå limen, bakt kvitløk og chili. Dersom du vil ha ein mos med sting i, lar du frøa i chilien bli med. Viss ikkje pellar du dei ut.

Eg liker ein mos med litt grov konsistens. Derfor lar eg berre kniven gå nokre kjappe rundar, slik at mosen blandar seg utan å bli heilt fin. Smak til med salt og peppar.

Pensle klippfisken med vanleg olivenolje (den taklar litt meir varme enn den dyrare extra virgen). Dryss over litt peppar. Dersom fisken er passe utvatna, treng du ikkje salt. Men dersom fisken har lite saltsmak i seg etter utvatninga, kan du heller la gjestane drysse litt salt på sin eigen mat.

Legg gjerne klippfisken inni ei grillrist.

Klippfisken treng tre til fem minutt på kvar side, avhengig av kor tjukk den er. Når den begynner å flake seg, er den ferdig.

La fisken ligg nokre minutt på grillrista før du tenker på å løfte på den. Då er det mindre sjans for at fisken heng fast i grillrista.

Server den grilla klippfisken med poteter, bakt løk og avokado- og ertemos. Det er lov å ha nokre dropar extra virgen olivenolje over fisken på tallerkenen.

Legg att eit svar

Epostadressa di blir ikkje synleg. Påkravde felt er merka *

Denne nettstaden brukar Akismet for å redusere søppelpost. Lær korleis kommentarane dine vert handsama.