Kveldskos med quesadilla

Quesadilla-med-kylling-og-guacamole_1000Heime på Far min sitt kjøkken er fredagstacoen bytta ut med quesadilla. Tre generasjonar i huset tar ikkje feil, tortilla fylt med kylling og ost, og servert med guacamole, rømme og salsa fresca slår industrivarianten av tex-mex-mat ned i cowboystøvlane.

Nøyaktig kor eg smakte quesadilla i amerikansk fortolkning er eg litt usikker på. Men eg veddar ein shot tequila på at det var på den legendariske tex-mex-restauranten Mucho Mas på Grünerløkka i Oslo. Her vanka vi ofte i mine ungdomsår, på eit tidspunkt då det var lov å like countrymusikk (les: americana) og digge tex-mex.

Denne sjangeren av verdsmat har sine røter i det meksikanske kjøkken, men er fortolka av både meksikanara og gringos på begge sider av den muren Donald Trump drøymer om på grensa mellom Mexico og USA.

Quesadillaen blir laga i alle tenkelege former, som regel med mais-tortilla og den meksikanske Oaxaca-osten som grunnleggjande ingrediensar på meksikansk side. Den kan vere vegetariske eller proppfull av kjøttet både meksikanarane og amerikanarane er så glade i.

Sjølv vandra kompisen min Ingvald og eg nesten heilt ukontrollert over grensa frå amerikanske Laredo til meksikanske Nuevo Laredo på vår «road trip» gjennom sørstatane, då Trump knapt hadde tatt steget inn i TV-bransjen.

På den meksikanske sida var det yrande liv, pågåande seljarar, luktar i alle valørar og eit fargespel eg knapt hadde sett maken til. Då svolten tok oss fann vi ein restaurant med air condition og quesadilla på menyen. Den var himmelsk. Men midt i måltidet fekk eg auge på ein hengekøye-seljar. Eg kasta frå meg bestikket, fekk stoppa mannan og kjøpt ei slik vevd køye som indianarane i Mellom-Amerika ligg i om natta.

Den meksikanske avstikkaren var svært vellukka, og både hengekøya og quesadillaen er med meg framleis.

Oppskrift på quesadilla med kylling, salsa fresca og guacamole

Start med å lage salsa fresca og guacamole.

Ingrediensar og framgangsmåte for salsa fresca:

  • Fire store tomatar
  • Ein stor rød løk
  • Ein kvitløkbåt
  • Ein jalapeño-peppar (eller annan liknande chili)
  • ½ teskei salt
  • Safta frå ein lime
  • Ein liten neve finhakka, fersk koriander

Del tomatane i fire like står båtar. Ta ut frø og kjerne. Deretter skjærer du båtane i skiver, og finhakkar skivene på langs til små terningar.

Fjern skalet på løken, og finhakk.

Del chilien på langs, fjern frøa og finhakk chilien.

Fjern skalet på kvitløken. Press den flat med sida på kniven. Finhakk deretter kvitløken.

Bland tomat, løk, kvitløk, chili og koriander i ein bolle, ha på salt, og bland godt i hop. Sett salsaen kaldt til den skal brukast. Den kan gjerne lagast nokre timar i førevegen, då utviklar den meir smak

Til quesadillaen treng du:

  • Tre store eller fire middels stor kyllingfiletar av god kvalitet (ikkje sprøyta inn med salt og vatn)
  • Eit par store skeier nøytral matolje, for eksempel solsikkeolje
  • Seks middels store tortilla-lefser
  • Om lag 4 desiliter revet cheddar (eller anna ost som smeltar lett og har god smak)
  • Litt salt og peppar

Sett ein stor steikepanna på middel høg varme.

Tørk godt av kyllingfiletane. Dryss litt salt og peppar på begge sider.

Ha i solsikkeoljen i steikepanna. Eg bruker alltid ei panne med belegg som gjer at alt eg steiker slepp lett.

Når panna er varm og god, legg du kyllingfiletane nedi og steiker dei tre, fire minutt på kvar side – eller til dei er gjennomsteikte. Legg deretter kyllingfiletane over på eit fat og la dei kvile minst fem minutt. Steikepanna kan du tørke av med kjøkkenpapir, og la bli ståande på middels høg varme.

Deretter skjærer du filetane i fem, seks millimeter tjukke skiver på langs.

Finn fram ei tortilla-lefse. Før du skal legge den i steikepanna, skal den brettast over på midten, slik at den utgjer ein halvmåne.

Fordel først litt ost på den eine «halvmånen», deretter kyllingfiletbitar tett i tett, og til slutt ost igjen. Du skal maks bruke to tredelars desiliter med ost per tortilla. For mykje ost gjer at den flyt ut i steikepanna og svir seg.

Brett tortilla-delen du ikkje har fylt med ost og kylling over den andre.

Steik to og to «halvmånar» quesadilla i gangen, altså tre runder. Bruk ein steikespade når du skal snu quesadillaen i steikepanna. Dei skal steikast eit par, tre minutt på kvar side – men ikkje bli svartsvidde. Juster temperaturen dersom dei blir steikt for hardt. Quesadillen skal heller ikkje steikast på for svak varm, då blir det mjuk/blaut.

Legg dei steikte quesadillaene på ei rist etter kvart som dei er steikt. Dersom dei får kjølne litt, er dei lettare å skjere og handtere når du skal flytte dei over på tallerkenen.

Del quesadillaen i tre trekantar, fordel den på tallerkenane til gjestane, og server med guacamole, salsa fresca, rømme og gjerne litt mais og andre godsaker som meksikansk bønnestuing.

(Visited 295 times, 1 visits today)

Legg att eit svar

Epostadressa di blir ikkje synleg. Påkravde felt er merka *