«Sigøynerpasta» frå Toscana

Oppe mellom eldgamle steinhus i ein toskansk landsby med namn frå romartida landa det ein pastarett på bordet som eg aldri klarte å gløyme. Etter fleire år med leiting, kom eg over ei oppskrift på det kokken i landsbyrestauranten kalla «sigøynerpasta».

Kanskje er ikkje ordbruken heilt politisk korrekt, men det finns altså ein rett med namnet «garganelli alla zingara» som minner om retten eg fekk den eine gongen i dei toskanske fjellsidene.

Landsbyen – som eg av respekt for dei som fortalde meg om denne perla lar vere namnlaus – har berre ein enkel serveringsstad, ein liten butikk og litt anna. Her bur det ein kokk med gode kontaktar i jaktlaga i bygda, og stor respekt for det å lage fersk pasta til gjestane.

Menyen varierer, ei dag kan du vere heldig å få eksempelvis villsvin på tallerkenen, som vi gjorde. Men det var altså denne pastaretten vi skulle snakke om. Ein kremaktig saus smakssett med innmaten frå ferske, italienske pølser, små bitar av grilla, raud paprika vendt inn i breie band med pasta.

Via mine lokale kontaktar har eg prøvd å få oppskrifta, men kokken kunne ikkje heilt gjere greie for den. Med litt hjelp av eige minne, Google og utprøving på eige kjøkken, har eg kome fram til noko som liknar meir enn nok.

Dei fleste oppskriftene på garganelli alla zingara er det brukt såkalla garganelli-pasta, ein sylinderforma sak der sausen kan krype inni. Men tagliatelle eller endå breiare pastaband er minst like bra.

Oppskrift på «pasta alla zingara»

(nok til fire personar)

  • Om lag 300 gram fersk salccica-pølse (for eksempel dei frå Jacobs)
  • Ein stor, raud paprika (bakt)
  • Ein halv løk
  • Ein kvitlaukbåt
  • Om lag 200 gram passata tomat (ei halv flaske frå Mutti)
  • 1,5 desiliter matfløyte
  • Ei ause av kokevatnet frå pastaen
  • Ein knivodd riven muskatnøtt
  • Ein neve fersk persille
  • Salt og peppar
  • 400-500 gram garganelli- eller tagliatelle-pasta

Du får kjøpt bakt og sylta paprika på glas. Men om du heller vil bake den sjølv, smører du den inn med olivenolje, legg den i ei eldfast form og baker den i om lag 45 minutt på 180 grader i steikeomnen. Når den er bakt, har du den over i to rein plastposar tredd inni kvarandre, og lar den ligge til den kjølnar. Då kan du lett plukke av skalet og fjerne innmaten og stilken på paprikaen.

Fjern skalet på løken og kvitløken, og finhakk desse og paprikaen.

Sett over ei stor steikepanne på middels høg varme. Han i ein liten skvett olivenolje. Vreng innmaten ut av pølsene og ned i panna. Del bitane opp med ei tresleiv og brun den lett. Ha deretter i løk, kvitløk og paprika, og la dei surre nokre minutt.

I mellomtida koker du opp pastavatn til pastaen. Ha i salt og litt olivenolje. Ha i pastaen, og kok pastaen så lenge som det står på pakka.

Ha i tomat og muskat i sausen, og la den koke nokre minutt til, før du har i fløyte. La den koke nokre minutt til, og ha i finhakka persille.

Smak til med salt og peppar.

Når pastaen er kokt, har du i ei ause (om lag ein desiiliter eller halvannan) med kokevatnet frå pastaen. Vend godt rundt i sausen, vend inn pastaen og server med ein gong – helst med riven parmesan til.

(Visited 263 times, 1 visits today)

Legg att eit svar

Epostadressa di blir ikkje synleg. Påkravde felt er merka *

Denne nettstaden brukar Akismet for å redusere søppelpost. Lær korleis kommentarane din vert handsama.