Svinaktig saftig søndagsmiddag

Som regel er det umulig å kombinere alle ønsker i livet. For eksempel er det i utgangspunktet ein umulig balansekunst å lage søndagsmiddag mens du legg ut på skitur. Men det finns ei råd for den som er sugen på skinkesteik, og samtidig har ei leirgryte i skapet.

Eg har sagt det før, og kjem til å gjenta det: Slageren frå 1970-talet, Römertopf-gryta, er ei velsigning sjølv for den som ikkje går til kyrkje kvar søndag. Inni denne leirgyta med lokk kan du bake brød eller langtidsteike det seigaste kjøttstykke med fabelaktig resultat. Leirgryta held på alle gode smaker, og har ekstremt gode kokeeigenskapar.

Skinkesteika eller svinesteik er stadig vekk å finne i butikkhyllene til skampris – med positivt forteikn for deg som kjøpar. Sjølv hamstra eg til under 30 kroner kiloen nyleg. Problemet er at skinkesteika ofte kan virke tørr etter direktesteiking i steikeomnen. Men i leirgryta blir skinesteika svinaktig god og saftig, ikkje minst takka vere eit raust glas med syrleg eplemost eller eplesider oppi gryta, som base for den obligatoriske sausen.

Skinkesteik i leirgryte (nok til seks personar)

Til gryta:

  • 2 kilo skinkesteik
  • 2 gulrøtter
  • 1 stor løk
  • 1/2 purreløk
  • 150 gram sellerirot
  • 2 fedd kvitløk
  • 2,5 dl syrleg eplemost eller eplesider
  • 1 dl vatn
  • Salt og peppar

Til sausen:

  • 3 ss (usalta) smør
  • 3 ss kveitemjøl
  • 6-7 dl kraft frå steika i leirgryta
  • Salt og peppar

Poteter:

  • 12-15 store mandelpoteter
  • 2-3 ss vanleg olivenolje
  • Salt

Grønsaker:

  • 2-3 gulrøter
  • 1/2 brokkoli
  • 1/2 blomkål
  • 200 gram sukkererter
  • Ein neve svisker
  • Salt

Ta ut steika av kjøleskapet eit par timer før den skal i omnen. Fjern plasten, skyll vekk blodet under kaldt vatn og tørk med kjøkkenpapir. Dersom steika ligg i frysaren, tar du den opp og tiner den i kjøleskapet i minst 24 timer, før du legg den på kjøkkenbenken. Når du ikkje hurtigtiner, held kjøtttet på dei naturlege saftene.

Sett leirgryta i kaldt vatn ein halv times tid. Sett steikeomnen på varmluft på 175 grader.

Skrell og del opp grønsakene i terningar.

Varm opp ei steikepanne med litt matolje. Brun steika på alle sider. Ha oppi grønsakene og la dei surre nokre minutt. Bruninga av kjøtt og grønsaker får fram aromaen på ein betre måte enn om du let vere. Smal til med litt salt og peppar.

Ta leirgryta ut av vatnet og tørk av den. Legg grønsakene nedst i gryta, ha i steika med skinnsida opp og hell rundt eplemost og vatn. Sett steiketermometeret inn i midten av steika, ha på lokket og la steika kose seg til kjernetemperaturen er 74 grader. Idealtemperaturen er 76 grader, om du spør dei fleste kokker og Opplysningskontoret for kjøtt. Ettersom temperaturen ofte stig eit par grader etter at du tar kjøttet ut av omnen, er det greitt å  hente ut kjøttet litt før. Og bruk helst ein steiketermometer med kabel, slik at du ikkje må opne steikeomnen og lokket på gryta for å sjekke temperaturen. Då mister du varmen og steikeprosessen tar mykje lenger tid.

Mens kjøttet gjer seg mørt i leirgryta, har du halvannen til to timer (og kanskje litt meir tid) på deg til skitur – eller det du måtte ha lyst til!

Når du er vel heime, vaskar du potetene og del dei over midten (du kan sjølvsagt gjere dette før turen, då blir det endå mindre stress). Ha dei i ei omnsform (gjerne med bakepapir i botnen). Hell over litt vanleg olivenolje (ikkje extra virgen, for den tåler ikkje så høg varme). Vend om med hendene. Dryss over litt salt.

Skrell og del opp grønsakene.

Når steika har nådd riktig kjernetemperatur (altså 74 grader), tar du den ut av steikeomnen og har inn potetene.

Ta ut steika og legg den på ein tallerken ved komfyren.

Sil grønsakene gjennom eit dørslag over i ein bolle, og press ut dei gode saftene av grønsakene. Dersom du ikkje er så glad i feittet frå steika i sausen, fjernar du dette. Det legg seg som ei hinne øvst i bollen.

Smelt (usalta) smør og kveitemjøl i ein kjele eller jerngryte. Brun jamninga godt, men utan å svi den. Spe med litt og litt kraft, mens du vispar. La koke i minst fem minutt, så mjølsmaken forsvinn. Smak til med salt og peppar.

Kok grønsakene i lettsalta vatn dei siste fem, seks minutta før potetene er ferdige. Potetene treng 25-30 minutt i steikeomnen.

Del opp steika, og server den med poteter, saus, grønsaker og svisker.

(Visited 14  234 times, 1 visits today)

2 thoughts on “Svinaktig saftig søndagsmiddag

  1. Opps! Mindre enn to timar i omnen. Då me kom heim frå kyrkja etter to timar, var temperaturen 84… Neste gong prøver me med litt lågare omnstemperatur. Smaken er uansett fantastisk, og det er kjekt å bruke leirgryta til anna enn å samle støv…

    • Hei, Lisbeth! Godt å høyre at leirgryta ikkje lenger samlar støv:) Steikeomnane er så ulike når det kjem til reell temperatur. Min blir knallvarm med varmluft-funksjon, men lite varm med over- og undervarme. Uansett er det beste å bruke steiketermometeret, og min steikeomn slår seg heldigvis av når det innebygde termometeret tipper over ønske kjernetemperatur. Men bra du seier frå!

Legg att eit svar

Epostadressa di blir ikkje synleg. Påkravde felt er merka *

Denne nettstaden brukar Akismet for å redusere søppelpost. Lær korleis kommentarane din vert handsama.