Heilt frå mennesket forsto at korn kunne haustast, og mjøl kunne knusast og bli til deig, har mennesket steikt sine brød på steinheller. Vårt eige flatbrød har fått sin velfortente renessanse, og slik kvalitetsbakst blir prisa som om det var gull i spesialbutikkane. Dette urgamle bakverket krev sin mann eller kvinne, men det er verdt å prøve seg på å bake sitt eige flatbrød.
Du kan skilje ein god amatørkokk frå ein middels eller dårleg når du smakar på potetmosen hans. I mi eiga jakt på den perfekte potetmosen har eg inngått partnarskap med eit kjøkkenreiskap du ikkje vil skilje deg av meg når du første har fått auga opp for den. Ønsk deg potetpresse til jul!
I slekta mi er silda både eit bilete på velstand og fattigdom. Den var redninga i krigstid og uår, og orsaka til kortvarig rikdom den gong den blei kalla havets sølv. Men lysta på spekesilda har aldri endra seg.
Alle snakkar om lammesteika. Men faktum er at den langt mindre og av den grunn meir underskattta lammebogen er eit minst like saftig alternativ til søndagsmiddag. Ikkje minst når den har steikt så lenge i omnen at kjøttet fell frå beina av seg sjølv.
Sjølv om langt fleire butikkar leverer pølser i alle slags fasongar og smakar, er det nesten ingen som kan konkurrere med heimelagde pølser. Det er heller ikkje noko av det eg har lagd på mitt eige kjøkken som har resultert i meir ros frå gjestane mine enn tarmar stappa fulle av smakfullt kjøtt og krydder.
Fjellturen kan knapt bli verre når alle ledd verker, gnagsåra blomstrar og sekken er langt tyngre enn den burde være. Løysinga på det sistnemnde problemet er å tørke bær, frukt. sopp, kjøtt eller grønsaker sjølv – og redusere kiloa med matrasjonar til eit absolutt minimum.
Far min vaks opp på det vêrharde Bremangerlandet i Sunnfjord, med havet som næraste nabo. Der hausta dei for det meste frå havet. Fisk sto ofte på menyen heile veka, til og med på kviledagen. Søndag blei fiskekakene steikt opp, varma i brun saus og servert med kokte poteter og det som måtte finnast av grønsaker.
Langt utanfor mobildekninga til telegigantane, finn du framleis sommardrevne setrar der smøret glitrar som gull takk vere lukkelege kyr på fjellbeite. Er du blant dei som går med ein liten meieridraum i magen, melder du deg på budeiekurs.
Toppen på rikdom er for mange å kunne sette til livs så mykje hummar du vil utan å merke det i lommeboka. Men den som kjenner sjøkrepsen, vil sjeldan bytte den ut for storebror, havets kardinal. Spesielt ikkje når den ligg på grillen ein fabelaktig sommardag.
Sjølv om sommaren ofte lar oss i stikken, stimar makrellen like forbanna inn fjorden. Grilla makrell med løpstikke, nypoteter og rømmesaus utgjer eit enkelt og effektivt ritual for den som ville hylle grøda frå den varmaste årstida – uansett regn og kuling.